Miðvikudaginn 14. mars verður haldin keppni í Freestyle dansi í sal skólans. Nemendur úr 6. og 7. bekk munu reyna með sér, en þeir hafa æft undanfarið undir stjórn Evu Friðþjófsdóttur danskennara.
Keppnin hefst kl. 17:30 og er aðgangseyrir kr. 500 og allir velkomnir.

Þessa vikuna er vísindavika hér í skólanum og hefur starfsfólk skólasafnsins sett upp sýningu á vísindatengdu efni. Í tengslum við vísindavikuna verða nokkrir árgangar í beinum tengslum við samfélagið og heimsækja snjóflóðasetrið og Hafró og einn árgangur verður í samskiptum við Vísindavefinn.

Uppskeruhátíð tónlistarskólanna, Nótan, var haldin í dag í Tónbergi, sal Tónlistarskólans á Akranesi. Frá Tónlistarskóla Ísafjarðar kepptu bræðurnir Nikodem Júlíus Frach í einsöng og Mikolaj Ólafur Frach á píanó.  
Nikodem Júlíus, sem er nemandi í 4. bekk G.Í.  fékk sérstaka viðurkenningu fyrir góðan söng. Mikolaj Ólafur, nemandi í 6. bekk G.Í. var valinn til að keppa fyrir hönd Vesturlands og Vestfjarða á lokatónleikum hátíðarinnar sem haldnir verða í Eldborgarsal Hörpu sunnudaginn 18. mars n.k. 

Þetta er svo sannarlega glæsilegur árangur hjá þessum ungu bræðrum og óskum við þeim innilega til hamingju með frábæra frammistöðu.

Krakkarnir okkar unnu sinn riðil í Skólahreystinni og eru því komnir í úrslit. Við óskum þeim til hamingju með frábæran árangur.

Á morgun mun G.Í. taka þátt í riðlakeppni Skólahreysti MS sem fram fer í Íþróttahúsinu Austurbergi í Reykjavík. G.Í. keppir í 1. riðli með Vestfjörðum og Vesturlandi og hefst keppnin kl. 13:00.

Keppendur G.Í. þetta árið eru þau  Hálfdán Jónsson sem keppir í upphífingum og dýfum, Sigrún Gunndís Harðardóttir keppir í hreystipgreip og armbeygjum og þau Natalía Ösp Ómarsdóttir og Elvar Ari Stefánsson keppa í hraðaþraut. Til vara eru þau Patrekur Brimar Viðarsson og Elín Ólöf Sveinsdóttir. Allt eru þetta nýir keppendur fyrir utan Hálfdán sem tók þátt í fyrra og stóð sig frábærlega ásamt sínum félögum, en eins og allir muna þá lenti G.Í. í 3. sæti lokakeppninnar í fyrra. Þess má geta að allir þessir krakkar hafa verið að æfa á fullu síðan í haust í sérstöku Skólahreystivali hjá íþróttakennurum skólans.

Ef G.Í. sigrar þennan riðil, þá kemst liðið áfram í lokakeppnina sem verður í Laugardalshöll í apríl. Við óskum keppendunum að sjálfsögðu góðs gengis og fylgjumst vel með gangi mála.

Allar nánari upplýsingar er að finna á heimasíðu keppninnar, www.skolahreysti.is . 

Stefnt er að útivistardegi í Tungudal miðvikudaginn 7. mars fyrir nemendur í 5.-10. bekk. Gert er ráð fyrir að nemendur verði á skíðasvæðinu frá  kl. 9:30-13:00. 

Við förum þess á leit við ykkur, ágætu foreldrar/forráðamenn, að þið keyrið börnin ykkar á skíðasvæðið og sækið þau aftur.  Við vitum að ekki eiga allir foreldrar auðvelt með að keyra börnin sín og viljum við biðja þá foreldra, sem ekki hafa tök á að keyra barnið sitt,  eða koma því í bíl með öðrum að hafa samband við skólann í síðasta lagi fyrir hádegi þriðjudaginn 6. mars  svo við getum útvegað öllum far.

Á skíðasvæðinu er hægt að leigja skíði og kostar það um 2000 kr.  Þeir nemendur sem ekki fara á skíði geta haft með sér sleða og þotur.

Ekkert gjald verður tekið í lyfturnar en lyfturnar loka kl. 13:00 og þá verða allir að fara heim. Mötuneytið mun sjá um hádegishressingu fyrir þá nemendur sem eru í áskrift í mötuneytinu.  Aðrir þurfa að koma með nesti að heiman.

Nemendur eru hvattir til að koma með hjálma en þeir sem ekki eiga geta fengið þá lánaða á staðnum.

Þeir nemendur sem eiga lyftukort eru beðnir að hafa þau með sér, til að flýta fyrir afgreiðslu á svæðinu.

Foreldrar eru alltaf velkomnir með á útivstardaga skólans og skíðandi foreldrar vel þegnir.

Í skólanum er lesið meira og minna alla daga. En mánudaginn 5. mars ætlum við að hefja daginn með lestrarstund, þannig að allir, bæði börn og fullorðnir, taki sér bók í hönd og lesi í u.þ.b. 40 mínútur. Þá þurfa allir að passa að hafa bókina sína meðferðis og svo má hreiðra um sig þar sem hver vill – og lesa. Ef eldri börnin langar til að lesa með þeim yngri (eða öfugt), þá er það frjálst. Ef einhvern langar til að kúra frammi á gangi eða inni á bókasafni og lesa, þá má það líka. Fullorðna fólkið ætlar líka að lesa en það ætlar jafnframt að fylgjast með börnunum og gæta þess að allir hafi frið til að lesa, hvar sem þeir hafa komið sér fyrir. Það eina sem ekki má, er að lesa ekki, því að allir ætla að taka þátt og eiga notalega, sameiginlega lestrarstund í skólanum.

Laufey Sigurðardóttir og Páll Eyjólfsson munu á morgun halda tónleika fyrir nemendur G.Í. í sal skólans á vegum verkefnisins Tónlist fyrir alla. Þau hafa á undanförnum árum komið fram á fjölda tónleika í grunnskólum um allt land. Þau kynna hljóðfærin sín, og fara síðan í smá tónlistarlegt "ferðalag" sem hefst á Ítalíu, landi fiðlunnar og leika tónlist eftir Vivaldi og fiðlusnillinginn Paganini. Þaðan liggur leiðin til Spánar, lands gítarsins, og spila þau m.a. verk eftir Sarasate, Ibert (lag með spænskum áhrifum) og kynna gítarinn sem upprunalega er spænskt alþýðuhljóðfæri og leika Flamenco tónlist. Frá Íslandi er m.a. leikin tónlist eftir Pál Ísólfsson og Þorkel Sigurbjörnsson og svo er endað í Argentínu með seiðandi tango.

Leikfélag MÍ frumsýnir söngleikinn Grease á n.k. föstudag í Félagsheimilinu í Hnífsdal. Leikhópurinn ætlar að heimsækja 8. - 10. bekk á morgun kl. 10:00 og sýna eitt atriði úr uppfærslunni í sal skólans og verður því örugglega vel tekið.

Undanfarin ár hefur skólinn valið eitt tiltekið ljóðskáld eða rithöfund og nemendur unnið með texta þess á fjölbreyttan hátt. Í fyrra var það Megas og árið 2010 varð Davíð Stefánsson frá Fagraskógi fyrir valinu.

Nú er röðin komin að Vilborgu Dagbjartsdóttur, en hún er án efa á meðal þekktustu ljóðskálda landsins. Hún er einnig virtur og mikilvirkur þýðandi og barnabækur hennar eru löngu orðnar sígildar. Þess má einnig geta að Vilborg var sæmd heiðursmerki hinnar íslensku fálkaorðu árið 2000 þegar hún hlaut riddarakross fyrir fræðslu og ritstörf.

Næsta vika verður tileinkuð verkum hennar og verður afrakstur þeirrar vinnu vonandi sýnilegur á veggjum skólans.