VALMYND ×

Fréttir

Grýla og hyski hennar heimsótt

1 af 2

Þessa dagana er nemendum G.Í. boðið upp á jólasýningu á Gamla sjúkrahúsinu - Safnahúsinu. Að þessu sinni er fjallað um jólavætti, Grýlu og hyski hennar ásamt jólakettinum, auk þess sem álfar eru á vappi. 

Nemendur 5. bekkjar drifu sig í morgun og urðu ekki sviknir, þar sem þeir gengu inn í fjallasal með alls kyns kynjaverum. Jóna Símonía Bjarnadóttir sagnfræðingur, fræddi krakkana um sögu hinna ýmsu jólavætta og hlustuðu þeir af athygli.

 

Leikið í snjónum

Brugðið á leik á Silfurtorgi (mynd: bb.is)
Brugðið á leik á Silfurtorgi (mynd: bb.is)

Eitt af verkefnunum sem tengjast Comeniusarvinnunni í 8. bekk er að búa til myndbandsauglýsingu sem á að sýna að öll börn séu eins, hvar í heiminum sem þau búa. Hvert þátttökuland tekur upp stutt myndband af börnum að leik og síðan verður þessum myndböndum skeytt saman og bætt við tónlist og texta.

8. bekkur greip tækifærið þegar snjórinn kom í síðustu viku og brá á leik á Silfurtorgi. Kennararnir tóku leikgleðina upp á myndband sem verður lagt í þetta púkk.

Hönnuðir í 10. bekk

Undanfarið hefur 10. bekkur unnið að svokölluðu öskjuverkefni í stærðfræðinni. Nemendur unnu í hópum að hönnun öskju að eigin vali, en þurftu að uppfylla ákveðin skilyrði s.s. mynstur og flutninga. Hver hópur hélt dagbók um vinnu sína, reiknaði allt sem hægt var að reikna s.s. yfirborðsflatarmál, prósentur o.fl. og kynnti svo verkefni sín.

Frumleikinn er alltaf skemmtilegur eins og sjá má á meðfylgjandi myndum af hinum fjölbreyttu verkefnum nemenda.

Sundgarpar standa sig vel

Unglingamót Fjölnis fór fram í Laugardalnum um síðustu helgi og tóku rúmlega 300 sundmenn 14 ára og yngri þátt í mótinu frá 13 félögum. Þar á meðal voru 15 krakkar úr sundfélaginu Vestra.  
Mikolaj Ólafur Frach í 9. bekk G.Í. hafnaði í 1. sæti í 100 m. bringusundi og  3. sæti í 200 m. bringusundi. Einnig náði boðsundsveit Vestra frábærum árangri þar sem hún lenti í 4. sæti af 18 sveitum og voru aðeins 3 sekúndur frá bronsinu. Sveitina skipuðu þau Katla María Sæmundsdóttir og Linda Rós Hannesdóttir úr 6.bekk og Guðmundur Elías Helgason og Nikodem Júlíus Frach úr 7. bekk (www.hsv.is).

Húsbyggingar á aðventu

Heimilisfræðival skólans stendur í ströngu þessa dagana við bakstur og húsbyggingar, undir styrkri stjórn Guðlaugar Jónsdóttur, heimilisfræðikennara. Venju samkvæmt á aðventunni, rísa hin glæstu piparkökuhús, sem gleðja augu og bragðlauka nemenda eins og þessar myndir bera með sér.

Í fyrstu lotu risu sjö hús og er von á fleirum í næstu viku.

Dagur myndlistar

1 af 3

Í tilefni af Degi myndlistar býður Samband íslenskra myndlistarmanna-SÍM grunn- og menntaskólum landsins upp á kynningu frá starfandi myndlistarmanni þeim að kostnaðarlausu. Þessar kynningar hafa farið einstaklega vel fram og hafa margir skólar gert það að árlegum viðburði innan skólastarfsins. 

 

Solveig Edda Vilhjálmsdóttir heimsótti unglingastig í Grunnskólanum á Ísafirði þar sem hún talaði um starfið, sýndi myndir af verkum og sagði frá lífi listamannsins. Nemendur fengu tækifæri á að spyrja hana að lokinni kynningu þar sem spurt var t.d.  hversu mikið kostar verk, hversu langan tíma tekur að mála eitt verk, hvers konar pensla notar listamaðurinn, o.fl.

 

Á heimasíðu verkefnisins má finna myndbönd og fleira áhugavert um starf myndlistarmannsins. /ÓDJ

 

 

Bjálfansbarnið

Í dag kl. 10:15 mun Kómedíuleikhúsið heimsækja 1. - 3. bekk og sýna jólaleikritið Bjálfansbarnið og bræður hans. Hér er á ferðinni leikrit fyrir alla fjölskylduna sem fjallar um vestfirsku jólasveinana sem hafa ekki sést meðal manna í hundrað ár ef ekki meira.

Efnilegt íþróttafólk

Þrír nemendur G.Í. hafa nú verið valdir í æfingahópa fyrir yngri landslið Körfuknattleikssambands Íslands. Þetta eru þau Haukur Rafn Jakobsson í 9. bekk, Saga Ólafsdóttir í 10. bekk og Linda Marín Kristjánsdóttir einnig í 10. bekk.

Þá var Jón Hjörtur Jóhannesson í 10. bekk útnefndur kylfingur ársins hjá Golfklúbbi Ísafjarðar nú á dögunum og er það mikill heiður fyrir svo ungan leikmann.

Við óskum þessu íþróttafólki innilega til hamingju með þessar miklu viðurkenningar.

Fullveldisdagurinn 1. desember

1. desember árið 1918 tóku sambandslögin gildi en samkvæmt þeim varð þjóðin fullvalda en við höfðum áfram danskan kóng. Einnig skyldu Danir sjá um utanríkismál okkar og landhelgisgæslu. Langt fram eftir 20. öldinni var 1. desember mikill hátíðisdagur. Þegar lýðveldið var stofnað kom það til tals að sá dagur yrði þjóðhátíðardagur okkar, svo stór var hann í huga þjóðarinnar. En niðurstaðan varð sú að velja afmælisdag Jóns Sigurðssonar 17. júní. Til skamms tíma var fullveldisdagurinn frídagur í skólum landsins og stúdentar Háskóla Íslands halda enn veglega upp á daginn. 1. des. er einn af opinberum fánadögum okkar Íslendinga.

Opinn dagur

Mánudaginn 1. desember er opinn dagur hér í skólanum. Þá eru foreldrar sérstaklega velkomnir í heimsókn og hvetjum við sem flesta til að líta við hjá okkur.